जालना : शासकीय योजने अंतर्गत शालेय पोषण आहारासाठी उपयोगात येणारे गहू व तांदळाचा साठा, काळ्या बाजारात बेकायदेशीररित्या विक्री करण्याच्या उद्देशाने पोलिस व महसूल प्रशासनाने संयुक्त कारवाई करत जप्त केला आहे. या कारवाईत एकूण 6 लाख 37 हजार 418 रुपयांचा मुद्देमाल जप्त करण्यात आला असून, गोदाम मालकाविरुद्ध गुन्हा दाखल करण्यात आला आहे.
याबाबत माहिती अशी की, दि. 16 जुलै 2026 रोजी सायंकाळी पुरवठा व महसूल विभागाला गोपनीय माहिती मिळाली की, चांगले नगर, अंबड येथील एका खाजगी पत्र्याच्या गोदामात बेकायदेशीररित्या धान्याचा साठा करून ठेवला आहे. या माहितीच्या आधारे जिल्हाधिकारी आशिमा मित्तल यांच्या मार्गदर्शनाखाली गोपनीय पथकाने पोलीस कर्मचाऱ्यांसह रात्री 7.45 वाजेच्या सुमारास सदर गोदामावर छापा टाकला.
गोदामाच्या दरवाजाला कुलूप असल्याने आणि मालक शेख नसीर अब्बास बागवान (रा. अंबड) यांच्याशी संपर्क न होऊ शकल्याने, पंचासमक्ष गोदामाचे कुलूप तोडून आत प्रवेश करण्यात आला.
जप्त करण्यात आलेला मुद्देमाल तपासणी दरम्यान गोदामात कोणताही वैध परवाना किंवा नोंद नसलेला खालील मुद्देमाल मिळून आला यामध्ये गहू 189 गोण्या (एकूण 94.50 क्विंटल) – किंमत अंदाजे रु. 2 लाख 97 हजार 702 तर तांदूळ 152 गोण्या (एकूण 76 क्विंटल) – किंमत अंदाजे रु. 3 लाख 33 हजार 716 इतर साहित्य मध्ये शासकीय धान्य वितरणासाठी वापरली जाणारी 80 रिकामी पोती आणि 6 हजार 500रुपये किमतीचा एक इलेक्ट्रॉनिक वजन काटा असा एकूण रु. 6 लाख 37 हजार 418 मुद्देमाल जप्त करून गुन्हा दाखल करण्यात आला .याप्रकरणी तहसील कार्यालय अंबड येथील निरीक्षण अधिकारी किरणकुमार शत्रुघ्न खांडेभराड यांनी दिलेल्या फिर्यादीवरून आरोपी शेख नसीर अब्बास बागवान याच्याविरुद्ध अंबड पोलीस ठाण्यात अत्यावश्यक वस्तू अधिनियम, 1955 च्या कलम 3 आणि 7 अन्वये गुन्हा (रजि. नं. 0528/2026) दाखल करण्यात आला आहे.
सदर कारवाई जिल्हाधिकारी आशिमा मित्तल यांच्या मार्गदर्शनाखाली करण्यात आली असून, पुढील तपास पोलीस उपनिरीक्षक (SI) भगवान नरोडे करत आहेत.
दिलीप पोहनेरकर,9422219172
