जालना- गुंतवणूकदारांच्या पैशावर जणू काही बीड जिल्हा डोळा ठेवूनच आहे नव्हे तर त्यांनी गुंतवणूकदारांच्या पैशावर डल्ला मारण्याचा विडाच उचलला आहे की काय अशी शंका आता निर्माण व्हायला लागली आहे. ज्ञानराधा मल्टीस्टेट, राजस्थानी मल्टीस्टेट या दोन मोठ्या वित्तीय संस्थांनी गुंतवणूकदारांची कोट्यावधीची फसवणूक केल्यानंतर आता श्री साईराम अर्बन मल्टीस्टेट को-ऑपरेटिव्ह क्रेडिट सोसायटी मुख्य शाखा बीड ,असलेल्या या संस्थेच्या अंबड शाखेने गुंतवणूकदारांची फसवणूक केली आहे.
श्री साईराम मल्टीस्टेट सोसायटीची अंबड शहरात सुरंगे नगर भागात एक शाखा आहे. 2021 मध्ये या शाखेत गुंतवणूक करण्यासाठी शाखेच्या व्यवस्थापकांनी ग्राहकांना शोधण्यास सुरुवात केली .त्याच दरम्यान या व्यवस्थापकांचा झिरपी येथे राहणाऱ्या आणि तूर्तास सुरंगे नगर अंबड येथे राहत असलेल्या लक्ष्मण भीमराव सावंत वय 38 या वैद्यकीय व्यवसाय करणाऱ्या व्यक्तीशी संपर्क आला. मुलांच्या भवितव्यासाठी लक्ष्मण सावंत यांनी पाच लाख रुपये या वित्तीय संस्थेत ठेवले. त्यापैकी एक लाख रुपये मुदत ठेव तर उर्वरित चार लाख रुपये हे बचत खात्यात ठेवले .परंतु गेल्या काही दिवसांपूर्वी मुदत ठेवीची मुदत संपल्यानंतरही पैसे मिळत नव्हते आणि बचत ठेवीचे पासबुक भरून मिळत नव्हते त्यामुळे आपली फसवणूक झाल्याची त्यांना शंका आली आणि त्यांच्यासह इतरही काही ग्राहकांना सेवा मिळत नसल्यामुळे या ग्राहकांनी दिनांक एक जून रोजी अंबड पोलीस ठाण्यामध्ये तक्रार दिली होती. या तक्रारीच्या अनुषंगाने पोलिसांनी चौकशी करून आणि ग्राहकांनी देखील व्यवहार सुरळीत होतील या आशेवर आत्तापर्यंत वाट पाहिली, परंतु आज या ग्राहकांचा बांध फुटला आणि आपली फसवणूक झाल्याचे लक्षात आले. त्यानुसार आज या बँकेचे संस्थापक अध्यक्ष साईनाथ परभने तसेच उपाध्यक्ष, बँकेचे संचालक मंडळ, व्यवस्थापक आणि या सर्व घटनांना जबाबदार असलेल्या पदाधिकाऱ्यांच्या विरोधात अंबड पोलीस ठाण्यात गुन्हा नोंद केला आहे .भारतीय न्याय संहिता 316(2)(5)61(2) अन्वये हा गुन्हा दाखल केला आहे. लक्ष्मण सावंत यांच्यासोबतच जयश्री वराडे, गोरख वराडे, विष्णू कानकाटे, राजू शिंदे, अतुल गाडे, रमेश गाडे, रमेश बांगर, लता बांगर, विलास बांगर, मधुकर पालवे, दिपाली खवले, आदींच्या यामध्ये गुंतवणुकी आहेत.
सविस्तर बातम्यांसाठी डाऊनलोड करा edtvjalna हे ॲप, किंवा आमच्या www.edtvjalna.com या वेबसाईटला भेट द्या. फक्त व्हिडिओ पाहण्यासाठी edtvjalna या youtube वर जा.या बातम्या आपण फेसबुक,इन्स्टाग्राम,व्हाट्सएप चॅनलवर देखील पाहू शकता.
-दिलीप पोहनेरकर-9422219172
